BRINGING ASIAN RACING TO THE WORLD

編輯部

A A A

【JRAcing101】日本馬場都有鴛鴦草地?

JRAcing101將會以輕鬆閱讀為目標,讓讀者進一步認識日本賽馬嘅冷知識。為大家提供嘅,首先係日本中央馬會馬場嘅草地。

可能你會諗,草地咪草地囉,有乜咁特別呀?其實現今日本中央馬會所用嘅草地,大致分為兩類:野芝(noshiba)同埋洋芝(yoshiba)。

話說1981年日本馬會開始舉辦以招待形式舉辦嘅日本盃,當時安排係11月尾舉行。天氣正值由秋天冬天交界,日本馬會一直所用嘅日本產野芝,好多時都抵受唔住天氣轉凍而枯萎。當年遠征日本嘅外國騎練一見到啲枯萎咗嘅野芝就即刻唔開胃,直頭揶揄「你哋條草地跑道係邊度呀?」

有見及此,日本馬會係1989年之前,係札幌競馬場仲係兩條跑道都係泥地嘅時候,開始計劃引入耐寒性高嘅草種,嘗試製作通年綠化草地跑道嘅方法。最終選擇包括肯塔基藍草(Kentucky Blue Grass)在內嘅三種外來草種,製作現今稱之為「洋芝」嘅草地品種。

除咗耐寒性之外,兩種草地無論係莖部、彈性、對馬匹腳步嘅影響,甚至完成時間都有影響。一般上,由於野芝嘅根部稱為「匍匐莖(stolon)」,會係泥土入邊與其他附近嘅草莖連繫,除咗令地面較硬,場地彈性較低,亦都令馬匹奔跑嘅時候較難掘出泥頭,使完成時間較快。另一方面洋芝只會將莖部埋藏係泥土入邊,掘起泥頭較易,場地彈性較高同埋較軟,要求馬匹嘅力量就會更多,而且會令完成時間較慢。

除咗札幌,函館,新潟競馬場之外,所有馬場都係用野芝同洋芝嘅結合,稱之為交播技術(overseeding,オーバーシード)。至於札幌同埋函館,因為位處北海道,雖然只係喺夏天期間舉行賽事,但係都淨係用上洋芝。因為同其他馬場嘅草地唔同,所以馬迷秤往績嘅時候,都會考慮札幌同函館競馬場跑過嘅馬呢個因素。

至於新潟競馬場,就用上全野芝。除咗野芝會令場地較硬,時間較快之外,加上馬場結構上直線路段較多,減少馬匹轉彎時候嘅減速機會,所以普遍上新潟競馬場所做出嚟嘅時間會偏快。

A A A
SHARE

SUBSCRIBE TO OUR NEWSLETTER //

GET 'MICHAEL COX ON MONDAY' DIRECT TO YOUR INBOX

SUBSCRIBE

    訂閱《競馬論》電子報
    亞洲賽馬最新資訊盡覽無遺

      Expert ratings, tips & analysis for Hong Kong racing