東京競馬場上星期上演三歲雌馬三冠嘅第二關，日本橡樹大賽（東京競馬場，草地2400m，GI），由李慕華策騎嘅Stars on Earth（3歲雌馬，高柳瑞樹）勝出。呢匹史上第16匹成功贏得櫻花賞（阪神競馬場，草地1600m，GI）同日本橡樹大賽嘅「兩冠雌馬」，亦都係史上第一隻兩場雌馬三冠賽事都係騎師過檔贏馬。

雖然賽前馬迷對於抽到18檔有所憂慮，但係Stars on Earth出閘後係賽事早段走順守好二疊7，8位，再係轉正直路之後順勢移出中檔追趕前領馬匹。轉正入直路，先有川田將雅紀嘅Art House（3歲雌馬，中内田充正）一度透出，不過Stars on Earth以全組最快嘅33.7秒（600m）後勁，追趕Art House以及連達文嘅Stunning Rose（3歲雌馬，高野友和），順利以2分23秒9，近十年第三快嘅時間，贏得橡樹女王嘅寶座。

Stars on Earth自從上年10月係東京嘅兩歲未勝利賽取勝後，係之後一場兩歲嘅條件賽同埋兩場三歲嘅三級賽都同勝利擦身而過，因此係櫻花賞只係被馬迷看待為14.5倍嘅半冷門。雖然直路受阻又被撞到，但亦無阻川田將雅幫佢贏得第一場一級賽。無奈川田將雅因為與Art House母親Bar Code嘅淵源，最終決定放棄策騎Stars on Earth出戰橡樹大賽。

自上年10月冇一級賽進帳嘅李慕華，係杜拜世界盃賽馬日返日本之後對新冠病毒呈陽性，再係翌日因為有緊密接觸者要接受核酸檢測但冇向JRA報告而被「戒告處分」，乘風破浪後再係日本馬會放寬觀眾，係30552名馬迷面前以日本橡樹大賽嘅勝利一洗頹風，難怪李慕華係訪問入邊自信地表示「1600m（櫻花賞）贏得，2400m（橡樹大賽）又贏得，2000米（秋華賞）相信都會贏得！」

賽事開始前發生一段小插曲，石橋脩策騎嘅Sound Vivace（3歲雌馬，高柳大輔）係入閘前行圈拋低騎師反時針方向狂奔，比原定時間足足延遲咗15分鐘先至入閘。關西電視台（関西テレビ）提供時段轉播，東海電視台（東海テレビ）負責製作嘅賽馬節目「競馬BEAT」係賽事中段突然去咗廣告，返嚟之後賽事已經跑完。相反富士電視台（フジテレビ）製作嘅「大家的賽馬（みんなの競馬）」就直播賽事至覆磅完畢同派彩。係兩個電視台嘅處理高下立見之下，即使東海電視台已經係節目完結時播返衝線一刻，網民似乎唔收貨，並且係Twitter等嘅社交媒體對於電視台嘅處理表達不滿。

雖然日本馬會已經放寬入場人數至七萬名，不過面對生活習慣嘅改變，加上全國每日嘅確診人數都依然喺三萬幾人嘅程度，「居家睇馬」文化嘅盛行可以從2020年起網上投注戶口開設數目有25.4%嘅增長上睇到。消息指東海電視台事後發聲明道歉，但一場全國受到注目嘅賽事突然被廣告插播，對於廣大仍然依賴電視媒體觀看賽馬嘅馬迷來講，不難想像佢哋會感到掃興。

資料來源：每日新聞，中日新聞

圖片來源：JRA

【JRAcing101】日本馬場都有鴛鴦草地？