自2018年起，日本國內嘅繁殖用雌馬以及登錄喺血統名簿新出世嘅馬匹數目都逐漸上升。經歷2013年嘅低潮之後，兩項數據都已經回復至2008年嘅水平。每年，日本國內有多於7000匹嘅純種馬出生，雖然能夠落場競賽嘅會再少啲，但係數量之多都足以承托日後賽馬嘅發展。

要喺每年多於7000匹嘅馬匹當中挑選精英不難，難的卻是要去制定一套賽事制度去根據馬匹嘅競賽能力來分類，同時亦要確保賽馬體系嘅公平性、向上流動性、同埋發展與其他賽馬地區嘅交流時非常重要嘅資格互換性等等，實在一啲都唔簡單。

日本自1984年起導入級際賽制度。面對歐洲及北美嘅賽馬體系相繼於70年代引入級際賽制度，掌管絕大部分本地賽事嘅日本中央競馬會，亦都根據每一場賽事嘅條件（如負磅、獎金等）將以往稱之為「重賞」嘅重要賽事劃分為三級、二級，或一級賽。但係呢個制度同其他國家嘅制度當時沒有任何互換性，另外由於引入級際賽嘅主要原因喺為咗吸引更多馬迷，而且參賽馬匹嘅水平分配同分級不成正比，所以當時都受到唔少嘅批評。

直至2006年，國際賽事編錄標準委員會（International Cataloguing Standards Committee）將日本認定為第二部賽馬地區，即代表雖然日本馬會一直沿用嘅級際賽制度底下嘅級際賽同國際認可嘅級際賽不能接軌，但係就可以就個別賽事向委員會提出申請。不過日本馬會冇咁樣做到。當時好似日本打吡大賽同埋天皇賞都喺日本馬壇非常重要嘅賽事，依然都喺限制日本受訓練馬匹先至可以參賽。

雖然自2007年起，委員會將日本升格為第一部賽馬地區，但係附帶條件，就係個別賽事必須由委員會評定並且評級。過度期間就出現「Koiuta事件」。Koiuta（コイウタ）喺一匹出自Fuji Kiseki（フジキセキ）嘅雌馬，三歲時櫻花賞跑入第三，跟住成績平平，直至松岡正海過檔爆冷贏出2007年嘅維多利亞一哩賽。

當時跟隨「隨心起舞」（Dance in the Mood，ダンスインザムード）步伐遠征至美國荷里活園馬場出戰二級賽Cashcall Mile Invitational Stakes（現稱Royal Heroine Mile Stakes）。賽事喺以曾否勝出級際賽為減磅條件（日本嘅制度就叫做「別定戰」），基本配磅喺123磅，冇贏過一級賽就減兩磅，冇贏過二級賽就減四磅，冇贏過三級賽就減六磅。Koiuta贏嘅維多利亞一哩賽喺日本就喺國內一級賽（JpnI），但係國際上就喺表列賽（Listed），所以當地馬會當時就配119磅。

到賽事當日朝早，多位有出戰馬嘅練馬師向馬會聯署，抗議「隨心起舞」2006年同樣贏出維多利亞一哩賽，同樣配咗123磅，咁點解2007年遠征嘅Koiuta就可以配119磅？雖然當時馬會解釋喺以委員會嘅評級嚟配磅，但係最終都抵受唔住壓力，Koiuta臨場改配返123磅，結果Koiuta更大敗而回。賽後日本中央競馬會向荷里活園馬場提出書面抗議。Koiuta就成為級際賽安排過渡期期間嘅爭論點。

經歷三年嘅過渡期，日本馬會喺2010年開始就再冇任何國內國外級際賽之分，基本上全部賽事都被委員會評定成為與國際接軌嘅級際賽，而且具備完善嘅系統評定賽事嘅質素。由國際賽事分級和規劃諮詢委員會（International Grading and Race Planning Advisory Committee，IRPAC）轄下嘅亞洲區評定委員會制定嘅評級系統，確認每場級際賽都要喺過去三年嘅出賽馬匹評分平均值都要維持一定水平，例如一級賽：三歲以上嘅一級賽，雌馬限定嘅賽事就要至少111，而雌雄混合嘅賽事就要維持喺115分或以上。